Bagair Hisab ke Jannat Mein Janay Walay 70 Hazar Log Kaun Hain?

bagair Hisab jannat me jane wale 70 Hazar woh log hain jo khalis tawheed par honge, shirk, badshuguni aur wahmon se door rahenge aur sirf Allah par mukammal tawakkul rakhenge

---

Bagair Hisab ke Jannat Mein Janay Walay 70 Hazar Log Kaun Hain? | Qur’an & Hadith

Aap ne kabhi suna hai un khushnaseeb logon se Mutalliq Jo bagair hisaab ke jannat me jayenge.Aakhir wo "Bagair Hisab ke Jannat Mein Janay Walay 70 Hazar Log Kaun Hain? "

✍️ By: Mohib Tahiri | 🕋 Islamic Articles| bagair Hisab ke jannati | Allah par Tawqqal | Aakhirat ki Taiyari 🕰 Updated:16 Jan 2026

Woh log jo shirk, badshuguni aur wahmon se door reh kar Allah par bharosa rakhte hain

Har Musalman ki sab se badi tamanna hoti hai ke woh Jannat mein dakhil ho.Lekin is se bhi badi ne‘mat yeh hai ke bina hisab kitab aur bina azaab ke Jannat mein dakhla mil jaye.

Rasoolullah ﷺ ne apni ummat ke 70 hazar aise khush-qismat logon ka zikr farmaya hai jo Qiyamat ke din baghair hisab ke Jannat mein dakhil honge.
Aaiye Qur’an aur Sahih Ahadith ki roshni mein samajhte hain ke yeh "Bagair Hisab ke Jannat Mein Janay Walay 70 Hazar Log Kaun Hain" aur unki pehchan kya hai.?

---

📜 70 Hazar Logon Wali Sahih Hadith

Hazrat Ibn Abbas رضي الله عنهما bayan karte hain ke Rasoolullah ﷺ ne farmaya:
Mere samne ummatein pesh ki gayin. Maine dekha ke kisi Nabi ke sath chand log hain, kisi ke sath ek ya do, aur kisi Nabi ke sath koi bhi nahi.
Phir mujhe ek bohat badi jama‘at dikhai gayi. Maine samjha yeh meri ummat hai. Kaha gaya: yeh Musa (عليه السلام) aur unki qaum hai.
Phir kaha gaya: afaq ki taraf dekho. Maine dekha to ek aur bohat badi jama‘at thi.
Kaha gaya: yeh tumhari ummat hai aur in mein se 70 hazar log aise honge jo bina hisab aur bina azaab ke Jannat mein dakhil honge.”

📚 Hawala:
Sahih Bukhari: 5705
Sahih Muslim: 220

---

70 Hazar Log Kaun Hain? (Hadith Ki Wazahat)

Rasoolullah ﷺ ne khud in logon ki chaar badi sifatain bayan farmayi hain:
📖 Hadith

“Yeh woh log hain:
♦️ jo jhaad-phoonk (ruqyah) ki darkhwast nahi karte
♦️ jo aag se daag dekar ilaaj nahi karate
♦️ jo badshuguni nahi lete
♦️ aur apne Rabb par mukammal tawakkul rakhte hain.”
📚 (Bukhari, Muslim)

 Naseehat:

Yeh hadith humein khalis tawheed, mazboot tawakkul aur shirk aur wahmon se doori ki da‘wat deti hai.
Har momin ko chahiye ke apne imaan, a‘maal aur bharose ko sirf Allah ke liye khalis kare, taake woh bhi un khush-qismat logon mein shamil ho sake.

---

Jo log Allah ki na-farmani karate Hain wo jahannum ki Khaufnak aur dardnaak Anjam ke liye taiyar rahen

---

In Chaar Baton Ki Asaan Aur Tafseeli Samajh

🛑 Jhaad-Phoonk (Ruqyah) Ki Maang Nahi Karte

Is ka yeh matlab bilkul nahi ke ruqyah haram hai.Ruqyah Qur’an aur sunnat se sabit hai aur khud Rasoolullah ﷺ ne dam bhi kiya aur ijazat bhi di.

👉 Is ka asal matlab yeh hai ke:
yeh log logon par zyada bharosa nahi karte,kisi buzurg, peer ya shakhs ko “aakhri sahara” nahi samajhte balkeh seedha Allah se madad maangte hain

Yeh yaqeen rakhte hain ke:

“Shifa dene wala sirf Allah hai.”

📖 Qur’an farmata hai:

“Aur hum Qur’an mein se woh cheez nazil karte hain jo shifa aur rehmat hai.”
📚 (Surah Al-Isra: 82)

---

🛑Aag Se Daag Dekar Ilaaj (Cautery) Nahi Karate

Daag dekar ilaaj shari‘at mein jaiz hai, lekin Rasoolullah ﷺ ne isay pasand nahi farmaya.

👉 Yeh 70 hazar log:
sakhti aur takleef se ghabra kar har tareeqa ikhtiyar nahi karte,balkeh sabr aur Allah par bharose ko tarjeeh dete hain

Is ka matlab yeh nahi ke ilaaj chhor dete hain,
balkeh yeh ke:
Unka dil ilaaj par nahi, Allah par hota hai.

📖 Hadith:

“Allah ne har bimaari ke sath uska ilaaj bhi utara hai.”
📚 (Bukhari)

---

🛑 Badshuguni Nahi Lete

Yeh log:

• din, tareekh, mahine se nahi darte
• parindon, saya, ishare, totkon aur wahmon par yaqeen nahi karte
• aaj din acha nahi” jaise jumle nahi bolte

👉 Kyun ke badshuguni:

• iman ko kamzor karti hai
• dil mein khauf paida karti hai
• aur tawakkul ko nuqsan pohanchati hai

👉is liye ye har haal me kahte haij,Jo kuch bhi hoga, Allah ke hukm se hoga.

---

Badshuguni Kya Hai?

Badshuguni ka matlab hai kisi cheez, din, tareekh, shakhs, janwar ya waqia ko nahoos samajh lena, aur yeh yaqeen kar lena ke is se nuqsan ya bura anjaam hoga.

Jab insaan bina daleel ke kisi kaam ko sirf is dar se chhor de ke
“shayad is se kuch bura ho jaye”,
to ise badshuguni kehte hain.

---

Rozmarrah Zindagi Ki Misalein

Aksar log badshuguni is tarah karte hain:

• ❌ Aaj falan din hai, aaj kaam shuru nahi karenge
• ❌ Kaali billi raasta kaat gayi, ab nuqsan hoga
• ❌ Safar nahi karenge, sapna acha nahi aaya
• ❌ Parinda ulta utra, kaam bigar jayega
• ❌ Kisi ne chheenk di, ab aage mat jao

👉 Yeh sab wahm aur badshuguni ki misaalein hain.

---

📖 Islam Badshuguni Ke Baare Mein Kya Kehta Hai?

🕊️ Allah Subhan wa Ta'ala ka Farman hai

“Unki badshuguni Allah ke paas hai, lekin aksar log nahi jaante.”
📚 (Surah Al-A‘raf: 131)

Is ka matlab yeh hai ke:

• nafa‘ aur nuqsan ka malik sirf Allah hai
• kisi din, janwar ya ishare mein apni koi taqat nahi

---

Rasoolullah ﷺ ne farmaya:

“Badshuguni shirk ki ek qisam hai.”
📚 (Abu Dawood)

Yani jab koi shakhs kisi cheez ko nuqsan pohanchane wali samajhne lagta hai,
to us ka bharosa Allah se hatne lagta hai.

---

Badshuguni Kyun Khatarnak Hai?

✔️ Iman ko kamzor karti hai
✔️ Allah par tawakkul ko nuqsan pohanchati hai
✔️ Dil mein dar aur bechaini paida karti hai
✔️ Insaan ko amal se rok deti hai

Isi liye Islam ne badshuguni se sakht mana kiya hai.

---

Badshuguni Se Kaise Bachein?

Jab dil mein koi wahm ya dar aaye to yeh dua parhein:

 اللهم لا طير إلا طيرك، ولا خير إلا خيرك، ولا إله غيرك”

Allahumma la tayra illa tayruk, wa la khayra illa khayruk, wa la ilaha ghayruk

Ma‘ni:
“Ae Allah! Tere faislay ke siwa koi badshuguni nahi, tere siwa koi bhala nahi, aur tere siwa koi mabood nahi.”

Saath hi yeh yaqeen rakhein: Jo kuchh bhi hoga Allah ki Marzi se hoga.

---

🧭 Khulasa

Badshuguni:

• dar hai
• wahm hai
• ghalat soch hai

Aur ek momin:

 ✔️ sirf Allah par bharosa karta hai
✔️ har haal mein umeed rakhta hai
✔️ apna mamla Allah ke hawale karta hai

Isi liye bina hisab kitab Jannat mein janay walay 70 hazar log badshuguni nahi lete.

---

"badshuguni shirk ki ek qisam hai kyun ke yeh Allah par bharosa kamzor karti hai.Allah par mukammal yaqeen rakhen har kaam Allah ki marzi se hota hai

---

🛑 Allah Par Mukammal Tawakkul

Yahi in 70 hazar logon ki sab se badi pehchan hai.

Tawakkul ka matlab yeh nahi ke:

• koshish hi na ki jaye
• sabab ikhtiyar na kiya jaye

Balkeh tawakkul ka matlab hai: 

• ✔️ koshish poori
• ✔️ dua poori
• ✔️ bharosa sirf Allah par

📖 Qur’an ki gawahi:

“Aur jo Allah par bharosa karta hai, Allah us ke liye kaafi ho jata hai.”
📚 (Surah At-Talaq: 3)

---

📖 70 Hazar Logon Ke Support Mein Qur’ani Ayat

 1️⃣ Sirf Allah Par Bharosa (Tawakkul)

“Agar tum momin ho to sirf Allah par bharosa karo.”
📚 (Surah Al-Ma’idah: 23)

👉 Yeh ayat wazeh karti hai ke imaan ki asal pehchan tawakkul hai।
Jo shakhs apna bharosa Allah ke bajaye logon, cheezon ya wahmon par rakhe, us ka imaan kamzor ho jata hai।
70 hazar log isi mukammal tawakkul ki wajah se bina hisab Jannat mein jayenge।

---

2️⃣ Allah Par Bharosa Karne Walon Ke Liye Allah Ka Kafi Hona

“Aur jo Allah par bharosa karta hai, Allah us ke liye kaafi ho jata hai.”
📚 (Surah At-Talaq: 3)

👉 Is ayat se yeh daleel milti hai ke:
Allah par bharosa karne walay ko kisi aur sahare ki zarurat nahi
isi liye woh log ruqyah ki darkhwast, badshuguni aur wahmon se door rehte hain

Yahi sifat 70 hazar logon ki bunyaad hai।

---

3️⃣ Shirk Se Paaki – Jannat Ki Shart

“Beshak shirk bohat bada zulm hai.”
📚 (Surah Luqman: 13)

👉 Jab shirk itna bada zulm hai, to:
jo log shirk ki chhoti se chhoti shakal jaise badshuguni, totkay, ghair Allah par bharosa se bhi bachte hain, wahi Allah ke khaas bande bante hain।
70 hazar log khalis tawheed walay honge।

---

4️⃣ Jo Log Apna Maamla Allah Ke Hawale Kar Dete Hain

“Aur jo apna maamla Allah ke supurd kar deta hai, Allah us ke liye kaafi hota hai.”
📚 (Surah Ghafir: 44)

👉 Yeh ayat wazeh daleel hai ke:
apna maamla Allah ke hawale kar dena dar, wahm aur badshuguni se nijaat deta hai

Isi sifat ki wajah se in logon par hisab hi nahi hota

---

5️⃣ Khauf Sirf Allah Ka Hona Chahiye

“Un se mat daro, mujh se daro agar tum momin ho.”
📚 (Surah Aal-e-Imran: 175)

👉 Badshuguni aur wahmon ki bunyaad dar hota hai,
jabke Qur’an momin ko sikhata hai ke dar sirf Allah ka ho।

70 hazar log isi Qur’ani usool par amal karte hain।

---

🧭 Khulasa

Qur’an ki roshni mein yeh baat bilkul wazeh ho jati hai ke:

✔️ Khalis tawheed
✔️ Mukammal tawakkul
✔️ Shirk aur badshuguni se doori
✔️ Har haal mein Allah par bharosa

yeh sab woh sifaat hain jo 70 hazar logon ko bina hisab Jannat ka mustahiq banati hain।

Yeh sirf fazilat nahi, balki Qur’ani waada hai Allah ki taraf se।

---

---

Kya Sirf 70 Hazar Hi Honge?

Ek aur hadith mein aata hai ke:

Har ek ke sath 70 hazar aur honge.

Yani Allah ki rehmat bohat wasi‘ hai.

📚 (Musnad Ahmad – Sahih)

---

🧭 Hum In Mein Shaamil Kaise Ho Sakte Hain?

✔️ Khalis Tawheed
✔️ Shirk aur bad‘aqeedi se bachao
✔️ Wahmon aur totkon se doori
✔️ Sabr aur Allah par mukammal bharosa
✔️ Sunnat par amal

---

(Conclusion)

Bina hisab kitab Jannat mein jana sirf kisi da‘we ka naam nahi, balki khalis tawheed, mazboot tawakkul aur ghalat aqeedon se doori ka nateeja hai.
Jo log apna bharosa sirf Allah par rakhte hain, badshuguni aur wahmon se bachte hain aur Sunnat ke mutabiq zindagi guzarte hain, wahi is azeem basharat ke haqdaar bante hain.

Sochiye........
Aaj humein khud se sawal karna chahiye:
kya hamara bharosa waqai Allah par hai?
ya hum logon aur asbab par zyada tikte hain?

Dua:

🤲Ya Allah humein bhi apne bharose walon mein shamil farmaye aur humein bina hisab Jannat naseeb kare.

🤲Ya Allah humein bhi un 70 hazar khush-qismat logon mein shamil farmaye.
Aameen.

---

👍🏽 ✍🏻 📩 📤 🔔

Like | Comment | Save | Share | Subscribe

By: Mohib Tahiri

islami Blogger:Is tarah ke aur islahi aur aakhirat se mutalliq mazameen ke liye hamari website ‘Aakhirat Ki Taiyari’ visit karte rahein.”sahih deen dusron tak pahunchayen 

---

🌟 قیامت کے دن کی تیاری آج کی جائے، کل صرف حسرت ہوگی۔ 🌟

---

🌿 is Article Se Related Mazeed Padhein

Loading...

---

FAQs: Bina Hisab Kitab Jannat Mein Janay Walay 70 Hazar Log

70 hazar log kaun hain jo bina hisab Jannat mein jayenge?

 Yeh woh log hain jo khalis tawheed par honge, shirk, badshuguni aur wahmon se door rahenge aur sirf Allah par mukammal tawakkul rakhenge.

---

Kya ruqyah (jhaad-phoonk) karana haram hai?

 Nahi.
✔️Ruqyah jaiz aur sunnat se sabit hai.
👉 Lekin yeh 70 hazar log logon se maangne ke bajaye seedha Allah se madad maangte hain.

---

Daag dekar ilaaj (cautery) kyun nahi karate?

 Yeh ilaaj jaiz hai,
👉 magar yeh log sabr aur Allah par bharose ko zyada ahmiyat dete hain.

---

Badshuguni kya hoti hai?

 Din, tareekh, parindon, ishare aur wahmon se darna badshuguni kehlata hai.

---

Kya badshuguni shirk hai?

Hadith ke mutabiq badshuguni shirk ki ek qisam hai kyun ke yeh Allah par bharosa kamzor karti hai.

---

Tawakkul ka sahi matlab kya hai?

 Koshish poori karna + dua karna + nateeja Allah par chhor dena = Tawakkul

---

Kya sirf 70 hazar hi Jannat jayenge?

 Nahi.
 Ek hadith mein hai ke har ek ke sath 70 hazar aur honge.
👉 Yani Allah ki rehmat bohat wasi‘ hai.

---

Kya hum bhi un 70 hazar logon mein shamil ho sakte hain?

 Ji haan, agar hum:

• khalis tawheed ikhtiyar karein
• shirk aur bad‘aqeedi se bachein
• Allah par mukammal bharosa rakhein
• sunnat par amal karein

---

Tags:

70 hazar jannat, bina hisab jannat, 70 thousand hadith hindi, tawakkul in islam, jannat without hisab